कैसौ आयौ नवल बसंत .....(. गीत - रसिया )

( रसिया )

कैसौ आयौ नवल बसंत सखी री मोरे आंगन में !
पोर पोर में आस , प्यास भर गयौ उसाँसन में !!

धरा नें ऐसौ करौ सिंगार !
चुनर सतरंगी , पचलड़ हार !
रसीले नैनन में कचनार !

अंग अंग अभिसार झरै, ठसकौरी दुलहन में ....
कैसौ आयौ ..............

उडे गालन पै लाल अबीर !
हो गई पायलिया मंजीर !
छनकती फिरै जमुन के तीर !

सखि मुंडेर पै कागा बोलै, कोयलिया मन में .
कैसो आयौ...............

चटख रह्यौ कली कली कौ अंग !
फली की देह भई मिरदंग !
नवल तन हूक और हुरदंग !

पिया संदेसौ पढे ननदिया काजर कोरन में ....
कैसो आयौ............

चढौ ऐसो टेसू कौ रंग !
जोगिया बन गए पिया मलंग !
बिलम गई फाग आग के संग !

मैं वासंती चुनर निहारत रह गई दरपन में ....
कैसो आयौ ..........


© 1992 Lalit Mohan Trivedi All Rights Reserved